Pagdakop sa tanang matang sa iho idili

CEBU, Philippines - Tinguha karon sa kagamhanan sa lungsod sa Daanbantayan nga idili ang pagpanguha sa bisan unsang matang sa iho sa kadagatan.

Matud ni Mayor Augusto Corro nga walay igong katakus ang lokal nga mga opisyal sa pag-ila kung unsa ang iho gidili nga dakpon ug unsa ang mahimong ibaligya ug kaonon. Suportado ni Bise Mayor Gilbert Arrabis Jr. ang tinguha sa mayor nga mapalabang ang usa ka ordinansa alang sa maong katuyoan.

Matud ni Arrabis nga wala’y nakitang dautan ang mga mananagat nga makakuha og iho sa ilang pagpanagat.

Gani nangutana pa ang mga mananagat kung unsay ilang himoon kung may masangit nga iho sa ilang pukot.

Buot ni Arrabis nga pabuhian balik sa dagat ang makuha nga iho.

Matud ni Arrabis nga ilang susihon ang ordinansa sa lungsod labot sa pagpanalipod sa mga buhi sa kadagatan o kaha maghimo sila og bag-ong balaud.

Ang nasud walay balaud nga nagprotehir sa mga iho samtang ang probinsiya sa Sugbo adunay ordinansa nga nagdili pagpanakop sa thresher sharks, whale sharks, giant manta rays ug sun fish.

Giduso usab ang pag-usab sa ordinansa aron malakip na ang hammerhead sharks nga sagad makuha sa mga mananagat ug ibaligya diha sa kamerkaduhan. (BANAT NEWS)