4-anyos gi-hostage sa bisyosong papa

CEBU, Philippines - Usa ka 4-anyos nga batang babaye ang giunay og hostage sa gihulagway nga bisyosong amahan kagahapon sa buntag diha sa Barangay Dumlog, dakbayan sa Talisay.

Ang 19-anyos nga inahan sa bata nga nahinabi sa Banat News kagahapon mibutyag nga ang suspetsado kinsa usa ka drayber sa traysikad giingong tiggamitan kini og ginadiling drugas.

Ang inahan sa bata mipasangil nga mamun-og kaniya ang suspetsado ug niadtong miaging Sabado nakigbuwag siya niini mao nga gidala niya ang ilang duha ka mga anak nga babaye nga kwatro ug dos anyos sa iyang mga ginikanan diha sa Dumlog.

Niadtong Martes sa gabii gikuha sa suspetsado ang 4-anyos ug gidala ngadto sa apohan niini ngadto sa iyang inahan nga nagpuyo diha sa Sitio Litmon, Dumlog apan tungod sa pagkabisyoso niini, gitambagan kini sa inahan sa suspek nga paadtoon ngadto sa amahan niini sa Minglanilla. Apan imbes nga motuman ang suspetsado nasuko kini ug nanghagis dayon mikuha og kutsilyo ug gihulgang iyang patyon.

Ang inahan sa suspetsado daling miadto sa Talisay City Police Station ug nangayo og panabang, naabtan pa sa mga polis ang suspek nga nagkupot og kutsilyo ug nagkugos sa anak.

Ang hepe sa TCPS nga si Superintendent Reycel Carmelo Dayon nagkanayon nga mitahan  usab dayon sa mga polis ang suspetsado ug giangkon niining tiggamitan siya og drugas. Dugang ni Dayon nga tun-an nila ang kaso nga posibleng mapasaka batok sa maong suspetsado. (BANAT NEWS)