Merkado sa Mandaue ibalik sa karaang pwesto

CEBU, Philippines - Daghan ang uyon sa tinguha sa kagamhanan sa dakbayan sa Mandaue nga ibalik ang merkado publiko sa karaang nahimutangan sa luyong bahin sa National Shrine sa Saint Joseph sa barangay Centro.

Si Mosuline Suliva, market administrator, nga nahinabi sa Banat News miingon nga kasamtangan na karong gihimo ang plano alang sa pagtukod pagbalik sa bag-ong merkado sa daan nga luna.

Kini maoy pagsanong sa kagustohan sa mga manindahay nga kasamtangan karong nag-okupar sa temporaryong puwesto sa sitio Tribunal.

Gipasabot ni Suliva nga wala ikabalaka sa manindahay ang mga dagkung malls ug supermarkets nga nagpalibot sa karaang nahimutangan sa merkado.

Giisip nga dakung bintaha ang mga baligya sa manindahay sa merkado publiko itandi sa mga malls tungod kay gawas nga ubos ang presyo, bag-o ug presko usab ang produkto sama sa  bugas, karne, isda, utanon ug uban pa. Si Mantuyong Barangay Kapitan Antonino Maquilan nga nahinabi sa Banat News mipadayag usab og pag-uyon sa pagbalik og tukod sa merkado publiko sa daang luna.

Hinoon gitataw niya nga kinahanglang kahimoan og maayong pamaagi nga limpiyo ang merkado aron kalikayan ang pagpangalisbo sa baho.

Gituyo ni kanhi mayor ug karon Bokal Thadeo Ouano nga ibalhin duol sa dagat ang merkado aron sayon ang pagpaawas sa hugaw ug sayon usab sa mga mananagat ang pagtumod sa ilang isda sanglit makadunggo man ang mga sakayan luyo sa merkado. (BANAT NEWS)