Ilegal nga recruiter sikop sa entrapment
CEBU, Philippines - Nagtingkagol sa Parian Police Station detention cell ang usa ka giingong illegal recruiter sa gipahigayong entrapment operation sa kapolisan kagahapon sa mga alas 11:30 sa buntag diha sa usa ka restaurant sa dalan Colon, dakbayan sa Sugbo.
Ang suspetsadong si Sulpicio Quiño, 61-anyos nga taga Barangay Sawang Calero, dakbayan sa Sugbo gipasanginlang nangayo og P5 mil kang Gregg Dela Torre, 30, taga Barangay Cansojong, dakbayan sa Talisay ug P6 mil kang Stallion Lopez, 29, taga Labangon, dakbayan sa Sugbo giingong bugti sa pasalig sa suspetsado nga sulod sa tulo ka adlaw makalarga na sila paingon ngadto sa nasud sa Qatar.
Apan niining ulahi lang nahibaw-an sa mga biktima nga si Quiño dili na diay kini konektado sa Plecewell Recruitment Agency nga nahimutang usab sa dalan Colon. Si Inspector Gualberto Oroc, deputy for operation sa Parian Police Station mibutyag nga ang duha ka mga biktima miduol sa ilang buhatan nangayo og panabang niadtong milabay’ng Biyernes
Matud ni Oroc nga si Quiño nagpailang technical evaluator sa nahisgutang recruitment agency.
Apan si Raquel Angcay representante sa agency mitug-an nga dili na konektado kanila si Quiño sanglit bag-ohay lang kining mi-resign isip technical evaluator.
Matud ni Angcay nga dili usab trabaho kaniadto ni Quiño ang pagdawat og kwarta sa pagpalarga sa mga aplikante.
Dugang niya nga ang trabaho kaniadto ni Quiño igo lang mangita og mga aplikante nga haom sa ilang gikinahanglan.
Atol sa entrapment operation naimbargo gikan sa posisyon ni Quiño ang P5 mil nga marked money, 10 ka ID nga dunay managlahing pangalan lakip na niini ang usa ka peke nga ID sa Professional Regulations Commission (PRC). (BANAT NEWS)
- Latest
