HPG-7 bag-o ang hepe
CEBU, Philippines - Duna na’y bag-ong hepe ang Highway Patrol Group-7 human gitumbok nga suspek ang mga opisyal niini sa pagbanhig patay kang Atty. Noel Archival.
Matud ni Police Senior Insp. Oliver Verba Plania, operation chief sa HPG-7 nga balik normal na ang operasyon sa ilang buhatan human nipagawas og kamandoan ang Kampo Crame nga mabutangan na og insaktong opisyal ang HPG-7.
Kasamtangang hepe sa HPG-7 si Senior Supt. Sheldon Jacaban samtang gidugang usab sila si S/Insp. Gregorio Sanchez, Insp. Charlie Reyes, Insp. Silvestre Cenia Jr.
Matud ni Plania nga nagkinahanglan usab sila og dugang non-commission officers nga mohulip sa nabakanteng pwesto aron mapatuman ang ilang trabaho.
Samtang nakig-alayon ang HPG-7 sa Lapu-Lapu City Police Office sa pagsubay kung nganong nakalusot ang sakyanan nga gigamit sa mga suspetsado nga naka-engkwentro sa kapulisan human misulay og baligya sa ilegal nga drugas.
Matud ni Plania nga andam sila nga mosubay sa record sa maong sakyanan ug kung asa gyud kini nakarehistro human nasayran nga Ampatuan ang usa sa mga apelyedo nga namatay atol sa maong engkwentro. (BANAT NEWS)
- Latest
