Credit card hacker sikop

CEBU, Philippines - Gipasanginlang hacker sa mga credit cards nasikop sa 7th Regional Criminal Investigation and Detection Group human duha na sab ang lain niya nga nabiktima.

Giila ang dinakpan nga si Jerwin Gurrea Minglanilla, 27, nagpuyo sa Laray San Roque, Talisay City ug kanhi scholar sa usa ka dakong unibersidad sa dakbayan sa Sugbo.

Matud pa nga modus sa maong suspetsado nga mogamit og lain nga credit cards, pinaagi sa pagkuha sa data sa iyang mga mabiktima gamit ang scheming device aron makopya ang card information ug iyang gamiton pag-withdraw sa kwarta sa biktima.

Ug gamiton usab sa pagpalit og ticket sa eroplano o gamiton pag-reserve sa mga hotel accommodations  ug ibaligya sa iyang kliyente.

Nasayran nga duha ka mga babaye nga taga Pagadian ang katapusang nabiktima ni Minglanilla, apan pag-atubang pa nila sa buhatan sa CIDG 7 wala sila mopadayon og reklamo.

Apan dunay warrant of arrest nga giisyu ni Judge Silva Paderanga sa RTC Branch 16 si Minglanilla maong gisikop gihapon kini sa mga operatiba sa kaso nga estafa.

Giingon nga aduna pa’y lain nga mga kauban ang suspetsado nga padayon nga gimonitor karon sa kapulisan nga posibling naglihok dinhi sa dakbayan. (/EIM)(BANAT NEWS)