Lumba sa langoy sa Mandaue

CEBU, Philippines - Lingaw kaayo ang mga tawo nga misaksi sa labing una nga lumba sa paglangoy ug lumba sa pagbugsay og sakayan nga gipahigayon didto sa dakbayan sa Mandaue kagahapon isip kabahin sa tinuig nga pangilin ni Senyor San Jose.

Ang kalihukan didto gihimo sa baybayon habig sa Mandaue Bridge Park ilawom nga bahin sa Marcelo Fernan Bridge sa Barangay Umapad ug gidumala kini ni Engr. Ricardo Mendoza, ang sports commissioner sa Mandaue.

Si Jaime Parawan nga taga Barangay Looc, Mandaue maoy giila nga labing kusog mobugsay sa iyang sakayan human niya gibiyaan ang uban nga miapil sa tulo ka kilometro nga lumba. Tres mil pesos ang iyang nadawat nga ganti.

Adunay laing lumba diin grupo sa lima ka tawo ang magbanus-banos pagbugsay sa usa lang ka sakayan.Kada usa mobugsay bali’g tulo ka kilometro, ug mobanos ang lain niini nga kauban, hangtod nga makahuman ang lima kanila.

Ang grupo nga taga Barangay Looc maoy midaog ug ilang naangkon ang ganti nga P5 mil.

Samtang sa lumba sa langoy, adunay 10 ka tawo ang miapil sa naglumbaanay sa usa ka kilometro ug tunga. Ang 29-anyos nga si Jucel Serafica, taga Barangay Looc mao ang midawat sa P3 mil. Matud ni Engr. Mendoza nga paningkamotan nila nga ang mao nga kalihukan mosamot pa kaalegre sunod tuig. (/RUB)(BANAT NEWS)