Balay sa Toledo gisaka og kawatan

CEBU, Philippines - Nag-inusara nga kawatan malampusong mikuha sa mga butang nga kantidad og P60 mil human niya sak-a ang usa ka balay sa Barangay Poblacion, dakbayan sa Toledo.

Ang balay nga gisaka sa kawatan gipanag-iya ni Lucia Tomarong, 51, minyo ug molupyo sa mao nga dapit.

Ang kapolisan miingon nga gisaka sa wala hiilhi nga kawatan ang panimalay ni Tomarong agi sa balkonahe og lahos na sa lawak sa biktima.

Gikuha sa kawatan ang bag ni Tomarong nga adunay kuwarta nga P40 mil, i-Pod Touch nga  mokantidad og P20 mil,  alahas nga wala pa matino ang kantidad nga naglakip sa mga relo ug ATM cards.

Ang kapolisan wala pa’y nahibaw-an nga tawo nga ilang gikatahapan nga responsable sa pagpangawat. (BANAT NEWS)