Wa kabayad naghikog

CEBU, Philippines - Patay na nga napalgan ang usa ka Amerkano nga nagbitay sulod sa kwarto niini nga giabangan sulod sa usa ka hotel sa F. Sotto Drive, barangay Camputhaw sa dakbayan sa Sugbo pasado alas 6:00 kagahapon sa buntag.

Ang naghikog naila nga si Garret Patrick Motley, 55, nga taga New York, USA kinsa naila sa mga higala nga usa ka professional surfer.

Base sa imbestigasyon sa Homicide Section sa Cebu City Police Office nga ang biktima napalgan ni Alfredo Gensun nga trabahante sa maong hotel nga nagbitay na ug wa nay kinabuhi.

Nasuta nga ang biktima migamit og cord nga maoy gihigot niya sa iyang liog ug sa kisame sa iyang kwarto.

Si Jay Basubas sa Emergency Rescue Unit Foundation (ERUF) kinsa maoy mihiling kang Motley wa na kini vital signs.

Way nakita ang mga imbestigador sa Homicide Section nga sila si SPO4 Rey Cuyos, PO3 Lou Pagara, PO3 Leroy Baguio ug si PO3 Nilo Aventurado, nga bisan unsang samad o bun-og sa lawas ni Motley.

Wa magtuo ang kapolisan nga dunay foul play sa iyang kamatayon sanglit wa man sad mausab ang mga gamit sa kwarto niini.

Ang mga niresponde nga mga sakop sa Homicide Section ug Scene of the Crime Operative (SOCO) nakarekober og usa ka eviction notice gikan sa management sa hotel ngadto sa biktima.

Ang maong notice nag-ingon nga dunay kapin sa P13 mil nga bayranan si Motley sa hotel. Matud pa nga sa wala pa maghikog ang maong langyaw mihangyo kini sa management sa hotel nga mo-extend kini og usa ka adlaw.

Apan mao na lay napalgan sa mga trabahante sa hotel nga patay na kini sulod sa iyang kwarto nga giabangan.  (BANAT NEWS)