Hepe sa Talisay mihimakak nga mi-coordinate nila ang NBI

CEBU, Philippines - Ang hepe sa kapolisan sa dakbayan sa Talisay nga si Supt. Resty Santos mihangop nga ipaubos sila sa imbestigasyon aron mahibaw-an kung kinsa ang giingong polis nga protektor sa drugas sa siyudad.

Si Chief Supt. Danilo Constantino, hepe sa kapolisan sa rehiyon mimando nga imbestigahon ang kapolisan sa Talisay nunot sa report nga giingong duha ka operasyon sa National Bureau of Investigation (NBI) ang nangasunog ug negatibo ang resulta human sila giingong mi-coordinate sa kapolisan sa siyudad.

Gihimakak ni Santos nga nakig-coordinate kanila ang NBI sa nangagi nilang mga operasyon tungod kay way bisan usa kanila nga nakadawat og pahibalo nga duna sila’y himuong operasyon sa Talisay.

Atol sa pagronda sa NBI sa Tabunok duha ka mga gipasanginlang notadong drug pushers nga sila si Jason Narido ug Nilo Abendan, apan nasikop usab sila si Romy Montalbo, Welbert Lopez, Mariano Risona, Dirk Lester Inoc, Marian Bas, Rolando Racasa ug Philip Christian Loyloy nga naatlan sa NBI diha sa lugar.

Matud pang Santos nga miresponde ang iyang mga sakop sa lugar tungod kay nakadawat sila og tawag nga dunay armadong mga tawo sa maong dapit apan sa ilang pag-abot mga NBI diay kini maong namalik sila sa agi.

Si Santos nagkanayon nga unta mopahibalo gyud ang bisan kinsang law enforcement units nga mosulod sa ilang hurisdiksyon tungod kay nabalaka siyang duna unya’y mahitabong engkwentro tali kanila.

Dugang ni Santos nga hugtangon ang ilang kampaniya batok sa ilegal nga kalihukan ilabi na sa ginadiling drugas.

Sa laing bahin, usa ka babayeng suspetsadong drug pusher ang nasikop sa nagpatrolyang mga polis niadtong Miyerkules sa gabii diha sa sitio Hawod, Barangay Bulacao, dakbayan sa Talisay.

Ang suspetsado mao si Alma Cabriana, 43, taga Barangay Lawaan I, Talisay nga naembargohan og 32 ka pakete, duha ka medium packs nga gidudahang may sud nga shabu  nga gibana-banang P50 mil ang kantidad.

 Matud pa nga gisita si Cabriana nga nagbarog daplin sa dalan nga kadudahan ang lihok ug dunay gibitbit nga kolor blue nga gamay’ng medicine kit nga dihang ilang gisusi ang maong mga ebidensya diay ang sud.

 Dugang pa sa kapolisan nga ang bana ni Cabriana atoa na sa Muntinlupa Bilibid Prison human makombikto kaniadto sa pagkalambigit sa ginadiling drugas.  (BANAT NEWS)