Mga kabus sa Mandaue tabangan nga moasenso

CEBU, Philippines - Ang nasudnong kagamhanan mitagana og P300 mil aron itabang sa mga kabus nga pamilya sa dakbayan sa Mandaue, apil ang pagtabang nga makapadayon sa pagtungha ang ilang mga anak.

Ang mga kabus g’yud nga pamilya sa Barangay Mantuyong, dakbayan sa Mandaue maoy una nga makapahimulos sa gitawag og Millennium Development Goals (MDG) Family-Base Actions for Children and their Environs in the Slum.

Ang kadagkoan sa Department of Social Welfare and Development (DSWD) ug Department of the Interior and Local Government (DILG) magtinabangay, uban sa kagamhanan sa Mandaue, aron pagpatuman sa mao nga proyekto.

Si Mayor Jonas Cortes miingon nga tugbangan niya ang kantidad nga gihatag sa nasudnong kagamhanan ug kun mahimo pa, iya pa gani nga palabwan ang mao nga kantidad.

Matud ni Violita Cabada sa Mandaue City Social Welfare and Development (CSWD) nga kining mao nga proyekto buwag kini sa gitawag og Pangtawid Pamilya Pilipino Program (4P’s).

Si Cabada miingon nga kadtong mga nahimo na nga sakop sa 4P’s dili na makapahimulos sa gitawag og MDG program kay lain na usab nga mga kabus ang ilang hatagan og pagtabang. 

Kabahin sa mao nga proyekto mao ang paghatag og tukmang pagkaon sa mga kabus nga pamilya, pagpatungha ug pagpahimutang kanila sa maayong kahimtang sa pagpuyo pinaagi sa paghatag og ilang panginabuhian.

Suknaon ang mao nga mga pamilya kun unsa ang ginagmay nila nga patigayon nga buot sudlan aron hatagan sila og mga puhonan.

Gisugdan na sa pag-survey sa mga social workers kun kinsa ang mga makabenepisyo sa Barangay Mantuyong nga maoy himoong “pilot barangay” sa pagpatuman niining proyekto.

Human sa Mantuyong, ang proyekto ipatuman na usab  sa laing 26 pa ka barangay sa Mandaue. (BANAT NEWS)