Mikapyot nga vendor og ampaw naligsan patay

CEBU, Philippines - Namatay ang usa ka ambulant vendor human maligsi og bus kay nadakin-as pagdayon niya og kapyot samtang nagdagan ang sakyanan didto sa Barangay Guadalupe, dakbayan sa Carcar kaniadtong Lunes sa hapon.

Ang namatay naila nga si Amado Rayanon Jr., molupyo sa nahisgotang barangay nga manindahay og ampaw, chicharon ug bocarillo. Sagad niya buhaton nga mokapyot g’yud sa mga bus aron makapaninda sa mga pasahero.

Mikapyot unta kini sa usa ka Metrolink Express bus nga nag-aginod ang dagan nga gimaneho ni Michael Dinolang, 39, taga barangay Poblacion, Samboan.

Ang maong bus gikan sa Samboan padulong sa dakbayan sa Sugbo niadtong tungora.

Si SPO1 Randy Chavez, desk officer, miingon nga si Rayanon naligsan sa tuo nga ligid sa atubangang bahin sa bus.

“Kanang nagdagan pa unya nipatong og kalit kay mangiyawat nga makahalin unya nadakin-as siya,” matud pa ni Chavez.

Matud ni Chavez nga wala makabantay ang drayber nga natagak si Rayanon dihang mikalit kini’g kapyot.

Mitahan hinuon sa iyang kaugalingon ang drayber human sa maong hitabo. (BANAT NEWS)