Mangingisda sa Olango gipusil, naangol
CEBU, Philippines - Naangol ang usa ka mananagat human kini pusila sa laing mangingisda samtang ang biktima didto sa usa ka diskohan sa Sitio Kauswagan, Barangay Talima, Isla sa Olango kagahapon sa kadlawon.
Ang biktima mao si Jeffrey Apa, 24, ulitawo ug mulopyo sa Barangay Cao-oy, Isla sa Olango nakaangkon og samad-pinusilan sa iyang dapi-dapi ug anaa karon sa Mactan Doctor’s Hospital sa dakbayan sa Lapu-Lapu.
Matud ni Apa nga ang mipusil kaniya mao si Brian Inoc, 23, ulitawo, ug nagpuyo gihapon sa Barangay Cao-oy.
Sa pasiunang imbestigasyon ni SPO2 Alfredo Macabudbud nasayran nga ang biktima ug ang suspek nga adunay dugay na nga panagsungi nagkaabot sa diskohan sa Barangay Talima.
Matud sa mga nakasaksi nga usa ka 38 kalibre nga revolver ang gigamit ni Inoc pagpusil ni Apa sa wala’y igo nga hinungdan.
Si Inoc hinuon nadakpan dayon sa kapolisan apan wala nila masakmit ang armas nga gigamit sa pagpamusil.
Matud ni SPO2 Macabudbod nga gitanggong karon sa detention cell si Inoc samtang giandam ang kaso nga ipasaka batok kaniya posible karong adlawa. (BANAT NEWS)
- Latest
