Daghang sakyanan ibaligya sa City Hall

CEBU, Philippines - Ang dakbayan sa Sugbo mobaligya sa dul-an 200 ka karaang sakyanan sa City Hall nga napalit kapin sa pito ka tuig na ang milabay.

Matud ni Konsehal Roberto “Bob” Cabarrubias nga kining mao nga mga sakyanan gastoso na kaayo kay kanunay na lang maguba ug kun ipaayo mugasto na og mas daku pa sa kantidad sa sakyanan.

Ang Cebu City Council kagahapon miuyon nga ibaligya na kining mao nga mga sakyanan aron nga ang City Hall mopalit na usab og mga bag-o nga sakyanan nga ipang-isyu sa iyang mga opisyal ug mga kawani.

Si Konsehal Cabarrubias miingon nga ang Bids and Awards Committee (BAC) giawhag nga mopahigayon og subasta sa maong mga sakyanan. Kadaghanan sa 179 ka sakyanan gigamit pa hangtud karon, ang uban niini giisyu sa mga konsehal sa dakbayan.

Kadtong gusto nga mopalit og usa lang ka sakyanan dili katugotan kay ang pagbaligya himoon sa tiningob nga paagi.

Matud ni Cabarrubias nga kadtong gusto nga mopalit og usa lang ka sakyanan adto na sila muhangyo sa makadaug sa subasta. (BANAT NEWS)