Mibanos-banos og lugos sa 14-anyos nadakpan

CEBU, Philippines - Gidakop sa kapolisan ang  amahan, anak ug apo nga suspetsado sa pagpanglugos sa usa ka 14- anyos nga batang babaye  nga  Grade V pupil sa  isla sa Olango, dakbayan sa Lapu-Lapu.

Ang gidakop ug gipasakaan na og kaso nga pagpanglugos sa kapolisan kagahapon mao sila si Albertino Maranga alyas Berting, 67, anak niini nga usa ka amang nga si Nolito Cabilao  Maranga, 48 ,  ug si  Reagan Ompad Maranga, 27 nga apo ni Albertino.

Gidakop ang tulo diha sa ilang balay sa mga sakop sa Presinto 1 sa Lapu-Lapu City Police Office (LLCPO) human sa pagdangop sa biktima ug sa iyaan niini diha sa ilang buhatan.

Si PO1 Rose Ann Gomez sa Women’s Desk Section sa Presinto 1 nga nahinabi sa Banat News miingon nga ang biktima mitug-an nga  unang gihimo nga pagpanglugos ni Albertino sa gabii niadtong Disyembre 12, 2012.

Matud pa nga gidapit  ni Albertino ang biktima sa pagpamista sa ilang balay nianang pagkagabii apan gidala niya kini sa hilit nga bahin sa sitio Asinan sa maong barangay ug  didto gitionan og kutsilyo dayon gilugos.

Human niini gibaharan sa suspek ang biktima nga di mosumbong ni bisan kinsa kung di kini gustong dunay dautang mahitabo kaniya ug sa iyang pamilya.

Apan human sa pagpanglugos nga nahitabo ni Albertino sa miaging Disyembre, daw naanad na ang suspek sa iyang gibuhat ug diha gilugos niya ang bata sa makadaghang higayon diha na sa balay sa iyaan sa biktima panahon nga wala ang tagbalay.

Ug dili pa lang dugay, subling gilugos ni Albertino ang biktima dihang wala diha ang iyaan sa bata apan niadtong tungora mibanos dayon ang anak niining amang nga si Nolito ug pagkahuman mipuli na usab ang apo nga si Reagan.

Matud pa nga sa matag lugos sa bata nagdala og mga hinagiban ang mga suspek ug kanunay kini hulgaon kung magsaba. Human sa mapait niyang kasinatian, milayas ang biktima  ug mipauli sa panimalay sa iyang inahan sa lungsod sa Consolacion, hinungdan nga kini giapas sa iyaan ug diha na kini misumbong kabahin sa paglugos kaniya.

Si Gomez miingon nga ilang gipaubos sa medical checkup ang biktima ug migawas sa resulta nga positibo kini nga gipanamastamasan. (BANAT NEWS)