CARCAR I-feature sa Discovery channel

CEBU, Philippines - Makita unya sa tibuok kalibutan ang nagkadaiyang lugar ug mga produktong ginama sa syudad sa Carcar.

Kini tungod kay ang syudad sa Carcar maoy usa sa i-feature sa Discovery Channel  sa cable tv unya sa bulan sa Abril.

Ang buhatan ni Carcar City Mayor Nicepuro Apura nitug-an nga nibisita niadtong nakalabay nga semana si Mig Ayesa, ang host sa Travel Dialogue, aron pagkuha sa nagkadaiyang mga hiyas sa syudad sa Carcar. Apil sa i-feature mao ang Balay nga Tisa sa ilang syudad, mga pagkaong ginama sa Carcar sama sa ampaw, chicharon, lechon, puso, atsara ug uban. Gani gitilawan gyud sa maong host ang maong mga pagkaon. Gitan-aw usab  ni Mig Ayesa kun giunsa sa pagluto sa lamian nga chicharon, ampaw ug ang paggama sa sanuk nga usa ka matang sa sapatos.

Si Apura sa iyang bahin nagpasalamat sa maong kahigayonan nga mapakita ang mga hiyas ug produkto sa Carcar. Nagtuo ang mayor nga mapalambo niini ang  ilang syudad. Si Ayesa nalakip sa mga langyaw’ng mga turista ug mga balikbayan nga nisalmot sa Suroy –Suroy sa Sugbo sa habagatang bahin sa lalawigan niadtong niaging semana.  (BANAT NEWS)