Ulo miligtik ug giluba angol

CEBU, Philippines - Miligtik ang ulo sa  usa  ka  lalaki  nga  gipusposan  og  kahoy  dayon  giluba sa iyang silingan didto sa dumpsite sa Purok Tambis, barangay  Umapad, dakbayan  sa Mandaue, kagahapon  sa  alas 10:00  sa buntag.

Ang biktima mao si Bernabe Mondejar Planco, 53  ug  ang mga suspetsado mao si Willy Villamor ug   Aldrin Toring nga pulos hingkod,  ug  silingan  ra  sa  biktima.

Si PO3 Nersas Baay sa kapolisan sa Presinto 5 sa Mandaue City Police Office (MCPO) nga nagbase sa barangay Opao nga nahinabi sa Banat News  miingon  nga  human  muligtik  ang  bagol-bagol  sa biktima  kay  gibunalan  og  kahoy ni  Villamor giluba  usab  dayon  ni Toring  sa  nagkalainlaing  bahin  sa lawas  niini.

Miingon  si PO3  Baay  nga  nagsugod  ang  kombati  dihang  nangalasbag  na ug  nagkalalis   ang  tulo .

Sa kapungot  ni  Villamor  mipunit  kini  og kahoy nga tres for tres ug gibunal sa ulo sa biktima  hinungdan nga natumba  ang  biktima. Apan  imbis  tabangon  ni  Toring  milanit  hinuon  kini  og  kutsilyo  dayon gitiwasan  og luba  ang  biktima.

Matud pa ni PO3 Baay nga gihatud  ngadto  sa  Vicente Sotto Memorial Medical Center sa dakbayan sa Sugbo sa  mga  barangay  tanod  sa Umapad.

Samtang  gipangita  pa  sa kapolisan  ang  mga suspetsado  kinsa  miikyas  dayon  human  sa hitabo. (BANAT NEWS)