Suspek pagpatay napusilan sa mga polis

CEBU, Philippines - Nasikop sa kapolisan sa alas 6:00 sa miaging gabii ang usa ka lalaki nga gikatahong mipusil patay sa iyang silingan sa barangay Pandan, sa dakbayan sa Bogo.

Ang suspetsado naila nga si Benhur Ancajas, 32, molupyo sa nahisgotan nga dapit. Ang biktima naila nga si Archie Albisa, 21, silingan sa suspetsado.

Base sa imbestigasyon sa kapolisan nga ang suspetsado mikalit lang og pusil sa biktima sa iyang ulo, matud pa nga dugay nang may pagdumot ang suspek ngadto sa biktima.

Daling gidala sa Cebu Provincial Hospital-Bogo City ang biktima apan gipabalhin kini sa dakbayan sa Sugbo tungod sa kadaot nga naangkon niini sa iyang ulo apan gikatahong namatay ang biktima samtang didto sa tambalanan.

Nakarekober ang kapolisan og usa ka kabhang sa .9mm nga bala. Naabtan pa sa kapolisan ang suspek apan midagan kini ug nakigpinusilay hinungdan nga napusilan usab kini sa tiyan. Ang suspetsado dali nga gidala sa kapolisan ngadto sa Cebu Provincial Hospital-Bogo City aron mapatambalan.

Narekober gikan sa suspetsado ang usa ka semi-automatic rifle nga AR-15 nga may 11 ka bala sa .9mm, usa ka kalibre .45 nga may 6 ka bala ug usa ka kalibre .45 nga pistola nga naa sa bulsa sa suspetsado. (/EIM)(BANAT NEWS)