Natapsingan sa bala aping natabas

CEBU, Philippines - Natabas  ang aping sa usa ka lalaki nga  natapsingan  sa bala  human  kini  pusila  sa iyang  silingan sa  Upper Tingob, dakbayan sa Mandaue   kagahapon  pasado alas 4:00  sa  kaadlawon.

Ang biktima mao si Mark Anthony Cajes, 20, ulitawo ug  ang nagpusil  kaniya  mao si Dindo Dabon, 25, ulitawo ug pulos  taga Upper Tingob.

Si PO2 Antonio Descartin sa kapolisan sa Presinto 4 sa Mandaue City Police Office (MCPO) nga nagbase sa barangay Basak nga nahinabi sa Banat News miingon nga nag-inom ang biktima ug ang suspetsado kauban sa pipila nila ka mga higala.

Dugang pa niya nga nangahubog na kini dihang nagkalalis  ang suspetsado ug   ug ang usa sa  ilang  gikainom  nga  higala.

Ang  biktima  kinsa  gibati  og  kabalaka,  kalit  nga miuwang sa duha.

Apan   nasuko  ang  suspetsado ug dayong  lanit  sa  giluklok niining armas ug gipusil ang  biktima.

Maayo  nalang  kay  nakalihay, busa  igo  lang  mitapsing  ang  bala  sa iyang  aping.

Misibat  dayon pahilayo sa maong dapit ang suspetsado  samtang  ang biktima dali nga gihatod  ngadto sa Vicente Sotto Memorial Medical Center sa dakbayan sa Sugbo.

Si PO2 Descartin miingon nga nabalhog na kaniadto sa ilang detention cell ang maong suspetsado dihang nadakpan kini nila nga nagdala og kutsilyo  apan nakagawas na kini ug hayan nga mahibalik kini sa bilanggoan sa higayon nga ilang madakpan niining  iyang  kaso  karon  nga  pagpamusil. (BANAT NEWS)