2 ka tawo pasakaa’g kaso sa managlahing krimen

CEBU, Philippines - Duha ka tawo ang gitakdang pasakaan og kaso sa kapolisan sa lungsod sa Consolacion karong buntag   tungod sa managlahing krimen nga ilang nahimo.    

Kini ang nasayran sa Banat News kang PO1 Albert Jiminez sa kapolisan sa nahisgotang lungsod nga nahinabi  kagahapon sa follow up nga gihimo.

Matud pa ni PO1 Jiminez nga si Dems Bonsukan Sadaya, alyas Jamez, 27, nga taga barangay Tipolo sa dakbayan sa Mandaue ilang pasakaan og kaso bahin sa  paglapas  sa Republic Act 7610 ug pagpanglugos sa usa ka  dalagita.  Samtang  si Sonny Tevez Suarez, 38, nga taga Cabangahan sa nahisgotang lungsod, ila  usab  nga paskaan og kasong murder kay mao  kini gitumbok sa mga saksi nga  mipusil patay kang Pulog barangay Konsehal Rey Sasing Balaba.     Matud pa ni PO1 Albert Jiminez nga si Sadaya nga giingong adunay laing kauban nga lalaki ug mao usab ang nagdala sa 18 anyos nga dalagita  wala pa gayud nila hiilhi.   Samtang ang gidagit nga dalagita nga taga dakbayan sa Lapulapu kansang  ngalan gipugngan  wala pa usab  masayri kun unsay gidangatan niini.     

Si PO1 Jiminez miingon nga samtang si Suarez nga mihimakak sa krimen nga iyang nahimo nagdumili usab kini sa pag-ila sa iyang pag-umangkon nga maoy nagmaneho sa motorsiklo dihang ilang gihimo ang pagpusil patay ni Konsehal Balaba. (Romeo T. Limpangog/WC)

Taho nga di katiwas  ang mayor sa Talisay gisalikway

Kusganong gisalikway sa buhatan sa mayor sa syudad sa Talisay nga si Mayor Johny Delos Reyes posibling dili na makatiwas sa iyang unang termino tungod sa pagkalandig niini sa tambalanan sulod na sa usa ka semana.

 Sigun  sa tigpamaba sa syudad sa Talisay nga si Vince Monterde nga dili tinuod ang maong kabalaka tungod kay dili grabi ang sakit nga gitagamtam  sa mayor. Mga sinaligang tinubdan nibutyag nga ang mayor nakaangkon og mild stoke hinungdan nga gidala kini sa Chong Hua Hospital niadtong nakalabay nga semana.

Apan gipasabot ni Monterde nga igo ra nga gipahulay  sa mayor ang nagsakit niining abaga bunga sa kakapoy nga nasinati sa biyahe gikan sa iyang pagbakasyon  ngadto sa Mindanao.

Gipahibawo ni Monterde nga dili angayan kabalak-an ang kahimtang sa panglawas sa mayor tungod kay dili kini dilikado ug dili madugay makabalik na kini sa trabaho sa city hall sa syudad sa Talisay. (BANAT NEWS)