Bag-ong DOST director gihangop

CEBU, Philippines -  Ang Department of Science and Technology sa Central Visayas (DOST-7) mihangop sa bag-ong gipiling Regional Executive Director niini nga mao si Dr. Carina Galvez Lao.

Sumala pa sa DOST-7 nga si Dr. Lao dili na bag-o pa sa ilang DOST system kay sa wala pa kini mapili isip bag-ong Regional Executive Director, nanarbaho na kini sa Philippine Atmospheric, Geophysical and Atmospheric Services Administration (PAGASA) sa DOST sulod sa 39 na ka tuig sukad sa 1974 hangtod karon.

Dugang pa sa DOST-7 nga si Lao bag-ohay pang migikan paingon sa China, Indonesia, Korea, Taiwan ug USA aron mosalmot sa nagkadaiyang workshops, fora  ug symposia mahitungod sa multi-hazard mitigation, typhoon behavior, strengthening meteorogical services ug uban pa.

Gisaysay sa DOST-7 nga ang dili maihap nga pasidungog ug rekognasyon ni Lao maoy timailhan sa iyang maayong dedikasyon sa panarbaho ug usab sosyal nga serbisyo.

Sa miaging ika 80th NRCP General Membership Assembly nga gipahigayon niadtong miaging Marso 2013 didto sa Manila Hotel, ang DOST NRCP mihingalan kaniya isip usa sa 12 ka batakang research achievers alang sa tuig 2012.

Gitug-an sa DOST-7 nga si Lao usa ka Regular Member sa NRCP Division XII: Earth and Space Sciences sukad pa sa tuig 1995 ug nga nahimo siya nga miyembro sa NRCP Governing Board (GB) niadtong natuboy siya isip Division XII Chairperson sa tuig 2004 ug nga mipahigayon og nagkadaiyang GB ranks nga naglangkob sa Member of the Personnel and Finance Committee 2004-2005; Assistant Corporate Secretary 2005 – 2008; ug Corporate Secretary 2008 – 2009.  (BANAT NEWS)