Dul-an 100 balay naugdaw

CEBU, Philippines - Gisugat sa gibanabanang usa ka libo ka molupyo sa sitio San Roque sa barangay Basak sa siyudad sa Lapu-Lapu ang tuig 2014 nga walay panimalay human moulbo ang usa ka dakong sunog kagahapon sa alas-2:25 sa kaadlawon.

Si Lapu-Lapu City Fire Marshal Supt. Oscar Mayol mibutyag nga kapin ug kulang 70 ka panimalay ang naugdaw sa 52- minutos nga sunog nga nagsugod sa panimalay sa usa ka Jocelyn Tomial.

Gidudahang electrical short circuit ang sinugdanan niini apan si Mayol nagkanayon nga ilaha pa kining susihon. Nakontrolar ang sunog alas 3:17 na sa buntag.

Usa ka 6-anyos usab ang naangol sa maong sunog hinuon luwas na kini sa peligro matud pang Mayol.

Si Mayol mibutyag nga giisa niya ngadto sa Task Force Bravo ang alarma tungod kay sudlonon kaayo ang  balay ni Tomial , sagad sa mga balay ginama sa light materials ug mikusog usab ang huros sa hangin kagahapon kaadlawon.

Matud pa ni Mayol, nga gisumpay sumpay pa nila ang walo nga tag 50 feet nga fire hoses aron lang makaabot sa sulod gikan sa ilang firetrucks diha sa karsada.

Gibana-bana ni Mayol nga mokabat sa P540 mil ang danyos sa maong sunog, apan gipaabot nga mas modako pa kini kun mahuman na ang assessment sa City Social Welfare Office.

Si Mayol mosugyot kang Lapu-Lapu City Mayor Paz Radaza nga pabutangan og access road ang nahigsutang lugar aron makasulod-gawas ang mga emergency vehicles.

Si  Tomial nga nahinabi ni SFO3 Atelano Beredo miasoy nga nangatulog silang tibuok sakop sa pamilya ug maoy ilang namat-an ang pagsilaob sa kalayo sa gawas nga bahin sa ilang panimalay diin usab mahimutang ang ilang abohan.

Ang kabomberohan sa  Cebu City, Liloan, Consolacion, lungsod sa Cordova, dakbayan sa Mandaue, ug dakbayan sa Talisay mitabang sa pagpalong sa kalayo.

Dugang pa nga mitubag sa maong alarma ang Cebu Chinese Filipino  Fire Brigade, Emergency Rescue Unit Foundation (ERUF).

Si  Basak Barangay Kapitan Isabelito Darnayla mipadayag nga  pabor sila sa pagpatuman og road reblocking sa maong lugar.

Ang City Social Welfare Office nanghatag og “ready to eat” ngadto sa mga biktima nga temporaryo karon gibutang sa ilang gym sa barangay.

Mopahigayon sila og special session aron magdeklarar og state of calamity sa maong lugar aron makatabang pinaagi sa paggamit sa calamity fund niini.  (BANAT NEWS)