Ballot box way sud

CEBU, Philippines - Walay sulod ang usa sa pito ka ballot boxes nga gidala sa korte may labot sa protesta sa eleksiyon ni Eligio “Liboy” Mantilla batok kang kapitan Samuel Sumagang sa barangay Bangbang, Cordova.

Kini ang nakapakurat sa kampo ni Mantilla lakip na ni Municipal Trial Court Judge Jocelyn Uy Po sa lungsod sa Consolacion diin gipahigayun ang subling inihapay sa mga balota niadtong Huwebes.

Si Po nimando sa duha ka habig nga moduso sa ilang mga ebidensiya sulod sa napulo ka adlaw aron madesisyonan ang kaso.

Sa unom ka ballot boxes nga naablihan na, nakalabaw na si Mantilla og walo ka botos.

Giangkon ni Mantilla nga sa presinto diin walay sulod ang ballot box, duna siya’y labaw nga 43 botos base sa ilang listahan.

Naglaom ang kampo ni Mantilla nga madesisyonan dayun sa korte ang iyang kaso sanglit ang katawhan ang makalolooy nga nagpaabot sa kamatuoran.

Hayan mag-atubang og kaso ang municipal treasurer sa Cordova nga si Jaime Sumagang sanglit siya ang custodian sa mga election paraphernalia nga nangawagtang.

Matud pa ni Provincial Election Supervisor, Atty. Lionel Marco Castillano, nga manubag gyud si Sumagang nganong walay sulod ang usa ka ballot box nga gidala sa korte.

Gisanglitanan ni Castillano nga kinahanglan nga adunay gwardiya ang pagbiyahe sa ballot boxes ug sulod niini sanglit sagrado kini nga mga butang.

Nagtinguha si Mantilla nga moduso og kaso batok kang Sumagang ingon man sa mga magtutudlo nga nagserbisyo sa hingtungdang presinto. (BANAT NEWS)