Tining Martinez molingkod sa hunta probinsyal

CEBU, Philippines - Sakop na sa Hunta Probinsiyal sa Sugbo si kanhi mayor Celestino “Tining” Martinez III human sa iyang pagkapili isip kapitan sa barangay Cayang, dakbayan sa Bogo sa eleksiyon niadtong Oktubre 28.

Sama sa Association of Barangay Councils sa Bogo, si Martinez walay kaatbang atol sa pagpili og pangulo sa ABC sa tibuok lalawigan sa Sugbo atol sa eleksiyon kagahapon nga gipahigayon sa Kapitolyo.

Kini maoy naghatud kang Martinez sa lingkuranan sa hunta probinsiyal hulip kang Jose Ribomapil Holganza Jr. nga maoy pangulo sa ABC sa lungsod sa Bantayan.

Si Holganza nagpaubos og posisyon ug maoy nag-una sa walo ka sakop sa board of directors sa ABC sa lalawigan sa Sugbo.

Nasublian nga bise presidente si Emerito Calderon sa Samboan kinsa napili usab niadtong 2010 kauban ni Holganza nga walay kaatbang.

“I hope I can live up to the expectation sa tanan and most especially, I hope and I look forward a very fruitful and successful league sa umaabot nga mga tuig,”  matud pang Martinez sa iyang kaubanan. Usa sa unahon ni Martinez pagtagad mao ang pagtabang sa Kapitolyo nga mahatud ang mga hinabang sa mga biktima sa bagyo sa amihanang bahin sa lalawigan sa Sugbo diin usa ang dakbayan sa Bogo nga grabeng naguba sa bagyo.

Matud pa ni Martinez nga ang iyang kasuod kang Gob. Hilario Davide III ang usa sa dakung tabang nga mapaabot ang mga hinabang. Masaligon si Holganza nga naa sa maayong kamot ang liga ubos ni Martinez.

Si Martinez nahimong konsehal sa kanhi lungsod sa Bogo hangtud nahimong mayor sa tulo ka termino hangtud sa 2007. Katulo hinoon napilde isip kongresista batok ni Kong. Benhur Salimbangon sa eleksiyon sa 2007, 2010 ug 2013.

Makatambong si Martinez sa labing unang sesyon sa hunta probinsiyal unya sa Enero sanglit katapusan nang sesyon ning tuiga niadtong Lunes diin nanamilit si Holganza sa iyang kaubanan. (BANAT NEWS)