Gidunggab patay sa silingan

CEBU, Philippines -  Patay ang usa ka  tawo nga gidunggab sa gikainom niining silingan sa sitio Togonon sa barangay Lamac,  dakbayan sa Danao  sa miaging alas 9:00  sa  gabii.

Ang biktima mao si Lucenio Lawas, 27, molupyo  sa maong  lugar  ug ang suspetsado  mao  usab si Dionesio Camanse, 26 , pulos ulitawo ug silingan sa  maong dapit. Si PO2  Roselo Campo sa kapolisan  sa maong dakbayan   nga nahinabi sa Banat News miingon nga ang biktima ug uban pa nga  mga higala  nag-inom sa panimalay sa  suspetsado.

Dugang pa ni PO2 Campo nga ang  suspetsado nga gikainom sa biktima nanghagis  tungod  sa kalasbag.

Dayon   gikuha niini ang kutsilyo ug bisan walay  igong  hinungdan kalit lang niining gidunggab ang   biktima sa makadaghang higayon nga nakaingon sa hinanali niyang kamatayon.

Matud pa ni PO2  Campo nga wala na madala ang biktima ngadto sa tambalanan  kay  patay  na man  kini  pag-abot  sa kapolisan.

Ang  suspetsado nga nagsusapinday pa sa kahubog dihang ilang gisukitsukit  ug  igo   lang kining mipadayag   nga wala  siya  masayud nga  nadunggaban   niya  ang iyang higala ug namatay.

Gibalhog kini karon sa  detention cell sa kapolisan sa maong dakbayan  ug gitakdang pasakaan kini og kasong  homicide ugma.  (BANAT NEWS)