Lider sa sindikato nga gisalmotan ni Kho nailhan

CEBU, Philippines - Nailhan na sa kapolisan ang lider ug miyembro sa sindikato nga giapilan ni Sandy Kho nga responsable sa pagpatay ni Edgar Cañete ug sa tulis sa Inayawan ug sa usa ka botika sa Talamban.

Si Chief Inspector Romeo Santander ang hepe sa City Investigation Branch sa Cebu City Police Office miingon nga ang grupo nga giapilan ni Kho usa ka well organized group apan  wala  niya ibutyag  ang  mga  ngalan  niini.

Midugang si Santander nga miluwat  og  extra-judicial confession si Kho sa pag-ila sa mga ngalan sa miyembro sa maong grupo lakip na sa lider niini.

Tungod sa maong confession matud pa ni Santander nga daghang kaso ang nangasulbad niini.

Sumala pa sa maong opisyal nga kasaligan  ang pamahayag ni Kho tungod kay nagtakdo kini  sa  mga kasayoran nga iyang  nadawat.

Miingon  si Santander  nga kung wala pa masikop si Kho may tulisonon  pa unta sila  sa dakbayan ug usa sa lalwigan sa Sugbo.

Gisusi na ni Santander ang kalambigitan sa maong grupo ug sa grupo sa Mindanao.

Giklaro sa opisyal nga bisan pa man sa pagkompisal sa maong suspetsado pasakaan gihapon kini og kaso sa kapolisan sumala pa ni Santander. (BANAT NEWS)