Tent City sa SRP buksan na

CEBU, Philippines - Gipahibawo sa buhatan sa mayor sa siyudad sa Sugbo nga mahimong buksan na sa sunod semana ang tent city sa South Road Properties (SRP).

Kini human susiha sa 30 ka mga personnel sa Philippine Red Cross (PRC) ang 13 mil ka metros kwadrado nga luna sa SRP alang sa katukoran sa tent city alang sa mga biktima sa bagyo gikan sa lalawigan sa Leyte ilabina sa syudad sa Tacloban.

Si Vic Jay Gonsal sa PRC nagkanayon nga natabunan na og mga bas ug yuta ang mga bahin sa luna nga may tubig.

  Iyang gitataw nga sa sunod semana hingpit na kining magamit alang sa pagtukod og mga tolda nga gitagana alang sa mga biktima sa bagyo sa Leyte.

Gihulagway niini nga ang nahisgutang tent city sa SRP may portable toilet, kusina ug kaliguanan sa mga evacuees.

Sigun pa ni  Gonzal nga unang maukopa sa maong tent city mao ang 50 ka mga pamilya gikan sa Leyte apan iyang gitataw nga 150 ka mga tolda ang ipabarug unya sa PRC sa nahisgutang  dapit.

Gipahibawo usab niini nga makig-alayon  sila  sa Department of Social Welfare and Development (DSWD)7  aron pag-screen sa mga benepisyaryo  sa maong tent city.

Hatagan og priority nga makapahimulos sa maong tent city ang mga pamilya nga wala nay kapaingnan nga mga paryente o kadugo. Dugang pa niini nga ang maong tent city magpabilin gikan sa 6 ka bulan hangtud  sa usa ka tuig pagsiguro nga makabarug gyud ang mga evacuees nga nabiktima sa bagyo didto sa Leyte. (BANAT NEWS)