Di akreditadong doktor sa LTO gireklamo

CEBU, Philippines - Nagpaabot si  Dr.  Danilo Dionson sa buhatan sa  Land Transportation Office (LTO) 7 sa resulta sa  iyang reklamo  bahin sa dili Accredited Physicians nga mo-check up sa mga tawo nga  mokuha og lisensiya sa drayber.

Gani  gipangayo ni Dionson  gikan  sa  LTO ang listahan sa mga Accredited Physicians sa LTO  kinsa  maoy gitugotan sa paghiling  sa  lawas  sa  mga  aplikante  og  lisensya  sa drayber.

Si Dr. Dionson nga nahinabi sa Banat News miingon nga ang iyang pagpangayo og listahan sa accredited Physicians sa LTO tungod kay iyang  namatikdan  nga  may mga doctor  nga dili  akreditado  sa LTO  apan  mohiling  ra  usab  sa panglawas  sa mga  aplikante og driver’s  license.

 Ang maong reklamo ni Dr. Dionson una niyang giduso   ngadto  sa buhatan sa officer in charge (OIC) Assistant Regional Director Arnel Tancinco sa LTO. Gihinganlan sila  si Dr. Nelson Seno, Dr. Elsie Trocio ug Dr. Dionson,  nga  mga  akreditadong  doktor  sa LTO. Sa nasayran nga si Dr. Dionson unang nakapadangat sa iyang reklamo kang  Mandaue City  officer in-charge   Fernando Bustillos tungod kay  adunay  pipila ka mga doktor nga dili accredited  physician sa LTO sa maong dakbayan.

Si Dr. Dionson mibahad nga kun mapakyas ang rehiyonal nga buhatan sa LTO sa paghatag og katin-awan sa gipadangat niyang reklamo iya  kining  ihandos   ngadto sa ulohang buhatan sa LTO o ngadto sa buhatan ni Presidente Benigno Aquino III. (BANAT NEWS)