Luna sa SRP ibaligya

CEBU, Philippines - Ang SM Prime Holdings Inc. nagtinguha karon nga mopalit og dugang 26 hektaryas nga kayutaan diha sa South Road Properties (SRP).

Kini maoy gibutyag ni City Administrator Jose Marie Poblete ug City Hall consultant Joey Daluz III atul sa gipahigayong budget hearing kagahapon.

Matud ni Poblete nga tag P16,000 ang assessed value sa matag metro kwadrado sa maong yuta apan ibaligya nila kini sa tag P20,000 matag metro kwadrado.

Si Poblete miingon nga kun mahalin ang 26.3 hektaryas nga kayutaan ang dakbayan mokita og kapin sa lima ka bilyon ka pesos nga magamit paggasto sa mga proyekto nga gihan-ay sa annual budget karong sunod tuig.

Ang P10.4 bilyones nga annual budget nga gisugyot ni Rama para sa sunod tuig ang P4 bilyones ra maoy anha kolektahon sa buhis, samtang ang P6 bilyones gikan sa halin sa kayutaan.

Ang yuta nga ibaligya sa dakbayan mao kadtong dakung hawan nga diha gipahigayon ang nasudnong misa-pasalamat sa pagkahimo nga santos ni San Pedro Calungsod.

Si Daluz miingon nga “cash basis” ang pagbaligya sa dakbayan sa yuta ug nagpasabot nga atul sa pagpirmahay unya sa Deed of Sale, ang makapalit mohatag og katunga sa kinatibuk-an nga kantidad.(/EIM)(BANAT NEWS)