Heavy equipment sa Lapulapu City giandam

CEBU, Philippines - Gipaandam na ni Lapulapu City Mayor Paz Radaza ang mga ekipo alang sa rescue operations sa mga posibleng maapektahang residente ug pangputol sa mga kahoy nga mabali gumikan sa bagyong Yolanda nga motugpa karong buntag o sa hapon dinhi sa Sugbu.

Kagahapon sa buntag si Mayor Radaza mimando sa tanang sakop sa Clean and Green sa pagpamutol sa mga kahoy nga duol na sa mga linya sa kuryente ug mga sanga nga delikadong mabali daplin sa mga kadalanan.

Lakip sa giandam mao ang dagkong chainsaws nga moputol sa mga dagkong punoan sa kahoy nga matumba sa kadalanan inabagan sa mga residente nga magtambayayong sa paglimpyo sa dapit nga dunay mga punoan nga nangabali.

Gisugdan usab kagahapon sa mga opisyal sa barangay ug mga sakop sa kapolisan sa pagpabakwit sa mga residente nga anaa sa daplin sa kadagatan ilabi na ngadto sa isla sa Olango.

Matud pa ni Lapulapu City Police Office Director Sr. Supt. Rey Lyndon Lawas ilang susihon kung unsa ka delikado ang sitwasyon sa mga kabalayan duol sa coastal areas ug kung magmagahi kini mapugos sila sa pag-implementar sa force evacuation diin mao kini mando ni Radaza.

 Hinoon nanghinaut ang maong mga opisyal nga hatagan unta og luwas nga kahimtang ang Sugbu sa hulga sa makusog nga bagyo pinaagi sa pag-ampo sa mahal nga patron sa dakbayan sa Lapulapu ang Birhen sa Regla ug Sr. Sto. Niño. (BANAT NEWS)