Konseho magsugod na’g tuki sa budget

CEBU, Philippines -  Ang mga sakop sa Cebu City Council magsugod na pagpahigayon og subsob nga Budget Hearing karong Lunes sunod semana aron tukion ang P10.4 Billion nga Annual Budget 2014 nga gisugyot sa Local Finance Committee ug giaprobahan ni Mayor Michael Rama.

Ang Budget Hearing himoon matag adlaw walay labot sa adlaw’ng Miyerkules nga sesyon sa konseho, ug sa mga adlaw’ng Sabado ug Domingo ug molungtad  hangtud sa Nobiyembre 29.

Tukion pag-una sa mga sakop sa Committee on Budget and Finance nga gipangulohan ni Konsehal Margarita “Margot” Osmeña ang gitawag og “sources of funds” kun asa og kwarta nga magamit pagpundo sa mao nga budget.

Ang gisugyot sa Local Finance Committee nga P10.4 Bilyones nga Annual Budget 2014 doble kay sa giaprobahan nga budget karong tuiga nga miabot lang og P5.1 Bilyones.

Human sa pagtuki sa sources of funds, ang isunod sa mga konsehal mao ang pagsuta sa mga gisugyot nga proyekto nga gastohanan sa dakbayan.

Basi sa gisugyot nga Budget, ang P6 milyones niini adto kitaon sa halin sa yuta ug ubang kabtangan sa dakbayan, ug gamay ra ang gikan sa koleksyon sa buhis.

Dunay uban sa mga konsehal nga miingon nga dili sila makapasalig nga aprobahan ang kinatibuk-ang kantidad kun dili nila masuta nga makolekta ang P10.4 Bilyones.

Karong tuiga bisan og ang giaprobahang budget miabot lang og P5.1 Bilyones apan ang nakolekta miabot pa lang og P4Bilyones, apil na gani ang Internal Revenue Allotment. – (BANAT NEWS)