Kasaulogan sa Kalag-kalag sa Mandaue malinawon

CEBU, Philippines - Malinawon ang duha ka adlaw nga kasaulogan sa Kalag-kalag  sa dakbayan sa Mandaue tungod  sa higpit  nga  pagbantay  sa kapolisan.

Si Chief Inspector Jimmy Aguisanda, hepe sa kapolisan sa Presinto 1 sa Mandaue City Police Office (MCPO) maoy nangulo sa pagbantay sa tulo ka mga sam-ang sa barangay Guizo nga gilangkoban sa duha ka pribado ug usa ka sam-ang nga gidumala sa simbahang Romano Katoliko.

Sulod  sa  mga  sementeryo  nga ilang gibantayan  nakasakmit  sila  sa hait nga mga hinagiban ug mga ilimnong makahubog   nga  gidala  sa  mga  miduaw  sa  lubong  sa  ilang  mga  minahal sa kinabuhi.

Si Atty. James Calipayan, executive secretary ni Mayor Jonas Cortes miingon nga 20 ka paramedics sa Emergency Rescue Unit Foundation (ERUF) ug Accident Control and Emergency Response Team (ACERT) ang nag-standby sa maong mga sam-ang sa pagtubag sa mga emerhensya   ug  sa   panglawas sa mga tawo nga miadto  sa sementeryo. Si SPO3 Danilo Barrita  sa kapolisan sa Presinto 3 sa Mandaue City Police Office (MCPO) nga nahinabi sa Banat News miingon nga malinawon kaayo ang duha ka adlaw nga kalihokan sa mga dapit nga ilang gibantayan.

Matud pa niya nga duha ka sam-ang  ang  ilang  gibantayan  nga nahimutang sa barangay Jagobiao ug  sa barangay Pagsabungan nga ilang giisip nga labing malinawon.

Si PO3  Manolito Labus sa kapolisan sa Presinto 6 sa Mandaue City Police Office (MCPO)  nga nagbase sa barangay Canduman miingon nga walay dautang panghitabo sa ilang  gibantayan  nga  pribadong sam-ang . (BANAT NEWS)