Sinumbagay sa Comelec –Mandaue imbestigahon

CEBU, Philippines - "Due process" ang gitinguha sa mga sakop sa Association of Reporters in MAndaue and Lapulapu In Truth and Equality o ARMALITE sa nahitabong sinumbagay tali sa usa ka media reporter ug sa Job Order o JO Employee sa Commission on Elections (COMELEC) Mandaue sa milabay’ng Martes.

Matud pa ni Jose "Pepe" Sollano ang presidente sa ARMALITE nga mas maayo kung adunay tukmang imbestigasyon nga himoon sa usa ka independent body sa maong issue aron masuta gyud kung kinsa ang sad-an sa nahitabong panagsukmagay nila ni DYSS-RGMA reporter Norman Mendoza ug Edgar Lumapas ug duha ka mga kauban niini nga mga JO employees nga nadestino sa Comelec-Mandaue. Atol sa meeting sa ARMALITE kagahapon sa buntag nasuta nga dunay mga alegasyon usab ang habig sa mga empleyado sa Comelec nganong nahitabo ang komusyon.

Gumikan niini nahukman sa mga sakop sa ARMALITE nga mas maayo kung adunay tukmang imbestigasyon aron masuta kung kinsa ang nagsulti sa matood ug masilutan ang nakahimo og kalapasan.

Bisan pa kung si Mendoza sakop sa ARMALITE isip bise presidente sa grupo nagkinahanglan gihapon kini og due process alang sa pag-angkon og hustisya sa duha ka habig.

Kahinumduman nga nakahiagum og mga bun-og sa kalawasan si Mendoza human kini tabangi og kulata ni Lumapas ug duha ka kauban niini, apan hugot nga gipanghimakak ni Lumapas nga siya ang miuna og pasakit ngadto ni Mendoza. (BANAT NEWS)