Sumada sa nagasto gikan sa calamity fund ipatuman

CEBU, Philippines - Nangayo na og binuwan nga sumada ang Commission on Audit (COA) sa nagasto sa kagamhanan sa lalawigan sa Sugbo gikan  sa calamity fund niini.

Gihimo kini sa  COA kay  wala  kini   mabuhat sa  milabay’ng  administrasyon  sa  niaging tuig.

Nasuta usab sa COA sa ilang 2012 audit report nga ang miaging administrasyon sa Kapitolyo wala’y nahipos sa nahabiling P126.5 milyones nga calamity fund sa usa ka special Trust Fund.

Gipasabot sa COA nga ang dili magasto nga calamity fund magpabilin kini sa panudlanan sulod sa lima ka tuig nga maoy gimando sa balaud.

   Kini aron dali nalang ang paggasto sa pundo sa higayon nga may muabot nga katalagman sanglit gigahin namang daan ang katuyoan niini.

Sa niaging tuig, ang lalawigan sa Sugbo adunay P98.7 milyones nga calamity fund apan P36.8 milyones lang ang naggasto, hinungdan  nga adunay nahabilin nga P61.8 milyones sa 2012.

 Samtang laing P64.6 milyones alang sa tuig 2011  nga wala na  igkita  karon.

Matud pa sa COA nga ang nahabiling pundo wala ikabalhin sa special trust fund gumikan sa giingong managlahing baruganan sa Provincial Accountant ug sa Provincial Budget Officer nga miresulta sa kapakyas  sa  paghimo og sumada sa nagasto gikan sa calamity fund.

Nunot niini, ang COA nimando na sa Provincial Accountant sa paghimo sa binuwan nga sumada sa nagasto aron maduso sa ilang buhatan.

Ang Provincial Budget Officer giawhag usab nga makigtambayayong sa Provincial Accountant sa pagbalhin sa nahabiling calamity fund sa usa ka trust fund.  (BANAT NEWS)