Ulo sa papa gibara sa anak

CEBU, Philippines - Brutal nga kamatayon ang gidangatan sa usa ka amahan gikan sa mga kamot sa iyang kaugalingong anak nga gituohang nalisoan sa pangisip human kini gilambosan og bara de kabra sa ulo ug gidugkal ang kalawasan niini gamit ang maong bara hangtud nga kini namatay.

Ang maong krimen nahitabo pasado alas- 8 ang takna sa buntag niadtong miaging adlaw sa sitio Suba 1, barangay Tabunok, lungsod sa Sogod. Ang namatay mao si Melecio Sugarol, 75, samtang ang suspetsado mao si Luin Sugarol, 36, kauban sa biktima nga nagpuyo sa maong dapit.

Si  PO1 Ervin  Jugarap sa kapolisan sa maong lungsod nga nahinabi sa Banat News miingon nga nagbulad sa linubo nga mais ang biktima dihang giingong giduol sa suspek nga nagdala og usa ka baldeng tubig ug giyabo kini sa gibuwad nga mga mais.

Tungod niini nasuko ang biktima ug giingong gilabhan og kasaba ang iyang anak.

Matud pa ni Jugarap subay sa nakuhang pamahayag sa mga imbestigador nagpunay lang og tisngi ang suspek bisan sa pagmaymay kaniya sa amahan ug sa kalit lang  gipunit niini ang bara de kabra ug gihapsan ang ulo sa iyang amahan,

Sumala pa nga pwerteng gubaa sa ulo sa biktima nga diretso og kahagba ug dihadiha gitiwasan pa kini sa suspek pinaagi sa pagdugkal sa dughan niini gamit gihapon ang maong hinagiban hangtud nga kini namatay.

Sa pagresponde sa mga polis, naabtan nila ang suspek nga naglingkod lang sa ilang panimalay nga daw walay nahitabo. Ilaha kining gidala sa presinto ug gisulod sa prisohan samtang gipaabot pa ang buhaton sa pamilya niini.

Matud pa ni Jugarap nga ilang naobserbahan sud sa karsel nga gihilam-os sa suspek ang tubig sa inidoro. Gikatakdang ipatan-aw sa kapolisan ang suspek ngadto sa psychiatric ward sa Vicente Sotto Memorial Medical Center. (BANAT NEWS)