Estudyante gi-ambush
CEBU, Philippines - Talandugon karon ang kahimtang sa usa ka 21-anyos nga estudyante sa kolehiyo human kini napusilan sa nawong nga ang bala milapos sa iyang ulo kagahapon sa kaadlawon diha sa dalan Duterte sa barangay Guadalupe ning dakbayan sa Sugbu.
Ang napusilan mao si Aldwin Jim, nga molupyo sa Sitio Riverside, Banawa sa maong barangay kinsa nakig-inom pa sa mga kahigalaan diha sa maong dapit sa wa pa kini mapusili.
Si SPO1 Geoffrey Gutual, homicide investigator sa Cebu City Police Office, nga nakahinabi sa Banat News sa telepono mibutyag nga walay tawong nakahatag kanila og ideya kung si kinsa ang mipusil sa biktima.
Nasuta sa imbestigasyon nga ang biktima luwan sa usa ka motorsiklo subay sa nahisgutang dalan aron unta mopalit og bino kay nahutdan na sila og giinom. Apan paglabay sa biktima sa nahitaboan dunay tawong kalit nga mipusil kaniya sa walay igong hinungdan ug maayong pagkaigo sa nawong niini ug ang bala milapos sa iyang ulo.
Bisan pa man sa iyang kahimtang nakamaneho pa ang biktima sa pagpadagan sa iyang motor padung sa ilaha ug didto nangayo og tabang hinungdan nga gidala kini sa usa ka pribadong tambalanan. (BANAT NEWS)
- Latest
