Tulisan patay sa shootout!

CEBU, Philippines - Namatay ang  usa  sa  duha  ka suspetsadong  tulisan kinsa  misukol og  pinusilay sa kapolisan  didto  sa barangay Guinacot –Simangan, dakbayan  sa Danao  kagahapon sa alas 8:30 sa buntag.

Ang  nakabsan  sa kinabuhi mao  si Bobby Godinez, nagpuyo sa Guinacot-Simangan, Danao kansang  lawas nabulit  sa  mga  samad  sa bala sulod  sa giabangan  niining  balay.

Ang Provincial Intelligence Branch sa Cebu Provincial Police Office naghimo og followup operation kalabot sa nahitabong pagpanulis sa La Carmona Mini Mart sa lungsod sa Compostela niadtong gabii sa adlaw nga Martes (Oktubre 1, 2013).

Matud pa nga nakuhaan og video footage sa maong tindahan ang mga dagway sa mga suspek kinsa nalakip usab diay sa rogues gallery sa kapolisan sa mga notadong tulisan nga naglihok sa Cebu.

Sumala pa nga positibong gitumbok sa mga witnesses ang duha diha sa CCTV footage ug sa ilang hulagway sa rogues gallery hinungdan sa gilusad nga hot pursuit operation batok kanila.

Unang nasikop si Guillercito Capute diha sa iyang balay sa barangay Cabungahan, Danao kinsa nakuhaan og usa ka calibre 45 nga pistol nga dunay lima ka buhing bala ug usa ka  granada.

"Among gipakita sa victim sa mini mart murag kakuyapun kay na-identify man niya mura'g na-trauma sa hitabo," matud pa sa hepe sa PIB nga si Supt. Rodolfo Albotra Jr. sa phone interview sa Banat News.

Sumala pa nga si Capute maoy mihatag og impormasyon sa PIB kung asa makita si Godinez hinungdan nga giadto kini sa grupo ni SPO1 Francis Alen Villamor ang balay nga gipuy-an ni Godinez diha sa Guinacot-Simangan sa Danao City.

Matud pang Albotra nga sa pag-abot didto giestoryahan unta nila si Godinez nga motahan sa malinawong paagi apan mibunot hinuon kini og armas ug namusil sa mga polis.

Tungod niini gipusil siya ni Villamor diha sa tuhod apan mibawos hinuon kini og pabuto hinungdan nga gibawsan kini sa kapolisan hinungdan sa pagkaigo niini sa nagkadaiyang parte sa iyang kalawasan.

"Delikado na man atong kapulisan unya daan na man kuno na siya naghisgot nga musukol gyud kung dakpon," sumala pang Albotra kinsa midugang nga nagduda sila nga ‘high’ sa illegal drugs si Godinez nianang tungora.

Nakuha gikan kang Godinez ang usa ka kalibre.45 pistola nga may magazine ug may sulod nga upat ka buhing bala, laing usa ka magazine nga may unom ka buhing bala ug duha ka cellphones.

Sumala pa sa PIB ang duha sakop sa usa ka armadong robbery gang nga nag-operate sa northern Cebu ug sa Metro Cebu.

"Nagplano unta ni sila manulis sa Cebu City pero sa pagkakaron nag-backtrack mi ani ilang grupo aron mahibaw-an nato ilang ubang miyembro," matud pang Albotra.

Si Godinez nabilanggo na kaniadto didto sa New Bilibid Prison sa Muntinlupa City tungod sa kasong murder ug nakagawas sa maong bilanggoan pipila ka tuig na ang nakalabay.

Kasong kalapasan sa RA 10591 o Comprehensive Firearms and Ammunition Regulation Act ug robbery ang ipasaka sa tulisan nga si Capute kinsa gibalhog na karon sa Consolacion police stockade.(Wen Celen, ug report nila ni Ria Mae Booc ug Romeo Limpangog/EIM)