Lalaking naglaba gipusil patay
CEBU, Philippines - Usa ka 58-anyos nga lalaki ang gipusil patay samtang nanglaba sa gawas sa ilang panimalay diha sa sitio Basak Eskuwelahan, barangay Basak, dakbayan sa Lapulapu alas- 7 pasado ang takna sa miaging gabii.
Ang biktima mao si Jose Junie Tul-id Mapait, nagpuyo sa maong dapit ug ang nagpusil mao ang wala mailhing lalaki nga daling miikyas human sa hitabo.
Si PO3 Lydo Pinos sa Homicide Section nga nahinabi sa Banat News miingon nga nanglaba ang biktima dihang kalit kining gipusil sa mamumuno sa makadaghang higayon.
Ang biktima nakaangkon og mga samad pinusilan sa dughan ug uban pang bahin sa iyang lawas nga nakaingon sa iyang hinanaling kamatayon.
Si Pinos miingon nga tulo ka mga kabhang sa bala sa kalibre .45 ang nakuha diha sa crime scene. Wala pay matumbok nga motibo ang kapolisan sa maong hitabo. (/EIM) (BANAT NEWS)
- Latest
