Negosyo ug trabaho mapaabot sa Mandaue

CEBU, Philippines - Makapaabot  ang  dakbayan  sa Mandaue  og dugang mga trabaho, investments ug negosyo  sa katapusang buwan ning tuiga. Kini ang gipasigarbo ni Mandaue City Mayor Jonas Cortes, atol sa gipahigayong taxpayers night niadtong  Biyernes didto sa Oakridge Pavillion, sa barangay  Banilad sa maong siyudad.

Matud sa mayor, nga dul-an sa 5 mil ka mga trabaho ang gitakdang maumol  sa katapusang buwan ning tuiga, diin laing Business Processing Outsourcing (BPO) company ang tukoron sa usa ka investor, samtang nagpadayon usab ang mga gitukod nga tambalanan sa may north reclamation area.

Mas palig-unon usab sa dakbayan ang Public Employment Services Office (PESO) aron sa pag-tie up og dugang investors nga mobubo og puhonan sa siyudad.

Mapasalamaton hinuon si Mayor Cortes sa paglambo sa ekonomiya sa dakbayan sa Mandaue, lakip usab sa kooperasyon nga gipakita sa Mandaue Chambers of  Commerce and Industry ug sa ubang negosyante. (BANAT NEWS)