Tabanao dakong pagkawala sa PDEA

CEBU, Philippines - Gihulagway sa Philippine Drug Enforcement Agency (PDEA)7 ang dakong  pagkawala ni Jessie  Tabanao  isip tigpamaba sa maong buhatan.

Ang hepe  sa PDEA7 nga si Lyndon Aspacio nagkanayon  nga dako kaayo ang papel ni Jessie Tabanao sa pagpakatap sa kasayoran bahin sa gidiling drugas.

Miingon  si  Aspacio  nga nakatabang og  dako si Tabanao  sa pagpakunhod sa supply sa gidiling  drugas.

Midugang si Aspacio nga usa ka dakong set back sa ilang ahensya ang kamatayon ni Tabanao dili lamang sa rehiyon 7 kundi  bisan  sa tibuok  nilang  ahensya.

Samtang gitataw ni Aspacio nga ang ilang buhatan mihatag na og tabang pinansiyal sa pamilya ni Tabanao.

Midugang  siya  nga moatubang sila sa imbestigasyon nga gipahigayon sa kapolisan sa kaso ni Tabanao ug nagpahigayon usab sila og susamang  investigation sa maong hitabo.

Apan hangtod niining higayona dili pa nila matumbok  kun may kalabotan ba ang kamtayon ni Tabanao sa iyang trabaho.

Sa susamang imbestigasyon   nga gihimo sa PDEA padayon sila sa pagsusi sa mga hitabo o mga lakaw ni Tabanao sa wala pa kini  pusila.

Hinuon mipasalig si Aspacio nga mokooperar sila sa imbistigasyon nga gihimo sa kapolisan sanglit kini man ang lead agency   nga   gituohan  nilang  dako  og  papel  aron masulbad  ang  maong  kaso.  (BANAT NEWS)