Kanhi opisyal ni Tabanao nakugang

CEBU, Philippines - Ang kanhi regional director sa PDEA-7 nakugang sa gidangatan sa iyang kanhi sakop nga si Jessie Tabanao nga nabalhin na sa Caraga Region apan gipatay sa pagpauli niini dinhi sa Sugbu niadtong Sabado sa gabii.

Si Julius Navales kanhi director ni Tabanao mipadayag dihang nahinabi sa Banat News nga nakurat siya sa nahitabo tungod usab kay sa iyang pagkahibalo niini maayong tawo ang biktima.

Gipadayag usab ni Navales nga wala usab makasulti kaniya si Tabanao kung duna ba siya’y kontra o death threats hinungdan nga nakugang siya sa maong balita.

Dugang pa ni Navales nga wala usab siya’y nadawat nga report o nabantayan nga adunay gikaaway o kontra ang biktima nga kauban niini sa trabaho tungod kay dako kaayo kining imposible.

Kagahapong adlawa unta ang pagbalik sa biktima sa Caraga Region kun asa siya bag-ohay lamang nga nadestino sa maong dapit sugod niadtong Septiyembre uno.

Human sa walo ka tuig nga pagka-radioman mitaak si Tabanao PDEA-7 diin una siyang nahimong jailer.

Ang nahitabo kang Tabanao, gikondinar usab sa mga sakop sa Kapisanan ng mga Brodkaster sa Pilipinas ug sa tanang sakop sa tigbalita.  (BANAT NEWS)