German gituohang giurom patay

CEBU, Philippines - Patay na nga nadiskobrehan ang usa ka German national nga gituohang giurom  samtang natulog sa lawak  nga iyang gipuy-an sa barangay Ibabao, lungsod sa Cordova, kagahapon  sa  alas 8:00 pasado sa buntag.

Si SPO1 Danny Alboro miila sa namatay nga mao si Karl Heinz Hoelser,  67, nga naminyo og Pilipina sa maong lungsod.

Si Henry Putol, hingkod, ug igsoon sa asawa ni Hoelser maoy  nakakita sa langyaw  nga  nagligid  sa kama nga wala  nay  kinabuhi.

 Matud pa ni SPO1 Alboro nga wala makagawas sa lawak nga gikatulgan ang maong German national ug gituohan sa asawa nga nahinanok lamang kini og katulog.

Mamahaw   na  unta  ang maong pamilya  busa gipapukaw  kini  sa iyang  asawa  apan  nakurat  si Putol dihang  nasayran  niini  nga wala na magginhawa ang iyang  bayaw.

Si SPO1 Alboro miingon nga gitaho dayon  sa asawa  ngadto  sa ilang buhatan ang  maong  hitabo ug   nangayo sila og panabang sa PNP Crime Laboratory sa pag-autopsy sa patay’ng lawas niini.  (BANAT NEWS)