Deretso team nanumpa sa lp

CEBU, Philippines - Pormal nang mihurar ngadto sa Liberal Party (LP)  si Lapulapu City Mayor Paz Radaza uban sa iyang mga kaalyado sa Deretso Team kagahapon sa buntag didto sa Malacañang.

Alas -10 kagahapon sa buntag uban ni Vice Mayor Marcial Ycong ug mga konsehales sa Lapulapu nanumpa ngadto ni LP Secretary General Mel Sarmiento ang grupo ni Radaza.

Si DILG Sec. Mar Roxas unta ang mopahurar kanila apan gumikan sa krisis sa Zamboanga nga maoy giatiman ni Roxas si Sarmiento ang mipapanumpa kanila.

Matud pa ni Radaza daan na nilang giplano ang pagtapon ngadto sq LP ug gani gikatakda kini kagahapon ug dili na gyud kini mabakwi pa ang ilang hukom. Gani sa milabay’ng semana si Cong. Aileen Radaza maoy unang mitapon ngadto sa LP.

Gumikan sa mga mihuras nga gihatag sa Malacañang ngadto kanila ilabi na sa sunodsunod nga proyekto karon sa dakbayan sa Lapulapu maoy usa sa hinungdan nga mitapon sila ngadto sa LP.

Nanghinaut si Mayor Radaza nga mahatagan og dugang pang mga kalambuan ug mga mihuras ang dakbayan sa Lapulapu bunga sa ilang pakighiusa sa administrasyon.

Ang Deretso Team kanhi sakop sa Lakas Kampi CMD apan matod pa ni Radaza hugot ang ilang suporta sa administrasyon ni Presidente Benigno "Noynoy" Aquino III.  (BANAT NEWS)