Signature campaign vs pork barrel

CEBU, Philippines - Gitinguha karon sa kagamhanan sa syudad sa Sugbo nga ang mga kawani sa city hall mosalmot usab sa nagpadayon nga signature campaign nga mga concerned citizens dinhi sa Sugbo nga kusganong nanawagan sa kongreso nga wagtangon na ang ilang Priority Development Assistance Fund kon PDAF nga mas naila na pag-ayo nga pork barrel fund sa mga kongresista ug mga senador.

Si City Administrator Jose Marie Poblete nipagawas og memorandum nga naghangyo sa mga kawani nga mosalmot sa maong kalihukan agi og pagpakita sa sentimento sa kinabag-an apil na ang mga kadagkuan sa kagamhanan sa syudad sa Sugbo nga nagpaluyo sa pag-abolish na sa pork barrel sa mga magbabalaod.

Si Poblete miingon usab nga angayan usab nga suportahan ang ipahigayon unya sa cause oriented group ingon man mga professional sector ang laing rally nga nagpalapad sa panawagan sa pagwagtang na sa pork barrel. Ang maong rally mopadulong sa Fuente Osmeña sa syudad sa Sugbo nga dungan usab sa ipahigayon nga "EDSA TAYO" nga rally didto sa kaulohan.

Laing paluyohan sa kagamhanan sa syudad sa Sugbo mao ang laing tinguha sa grupo nga nag-awhag gihapon sa mga magbabalaod nga mopasar og balaudnon nga nagtugot sa 70/30 porsiyento nga share sa Internal Revenue Allotment kon IRA pabor sa Local Government Unit kon LGU.

Sigon pa niini nga sa higayon nga mapasar ang maong balaod mas mabulahan ang mga LGU ilabina sa Cebu City government tungod kay dako man ang pundo nga makuha nga nagpasabot og dugang benepisyo alang sa katawhan sa maong syudad.  (BANAT NEWS)