Diamante mao nay pangulo sa LMP

CEBU, Philippines - Napiling bag-ong pangulo sa League of Municipalities of the Philippines (LMP) Cebu chapter si Tuburan Mayor Democrito Diamante Jr. atol sa gipahigayong piniliay kagahapon.

Ang kasamtangang pangulo sa LMP nga si Dumanjug Mayor Nelson Garcia sa One Cebu mao pa mismo ang ninominar kang Diamante.

Sa wala pa ang botasyon, si Garcia nipadayag nga gusto pa unta siyang mopasubli sa pwesto apan gusto siya nga magpabilin ang kahiusahan sa liga ug dili mabulingan og politika.

Hinungdan nga iyang giduso si Diamante nga sunod pangulo sa LMP ug giuyonan sa kapin 30 ka mga mayor.

Si Diamante nga layo sa iyang pagtoo ang iyang pagkapili isip pangulo sa LMP apan iyang gipasalig nga mabulokon ug malampuson unya ang grupo ubos sa iyang liderato.

Si Borbon Mayor Bernard Sepulveda nisugyot nga si Diamante na ang mopili sa ubang opisyal ug dili na ipaagi sa eleksiyon ug daling giuyonan sa kadaghanan.

Si Diamante nitudlo kang Cordova Mayor Adelino Sitoy isip bise-presidenti, Consolacion Mayor Teresa Alegado isip secretary, San Remigio Mayor Mariano Martinez isip treasurer, San Fernando Mayor Antonio Canoy isip auditor ug Daanbantayan Mayor Augusto Corro isip press relations officer.

Ang mga sakop sa board of directors mao sila si Mayor Lionel Bacaltos sa Sibonga, Ronald Alan Cesante sa Dalaguete, Teresito Mariñas sa Barili, Ace Stefan Binghay sa Balamban, Jose Esgana sa Santa Fe, Aly Arquillano sa San Francisco, Bernard Sepulveda sa Borbon, Marilyn Wenceslao sa Santander ug Lissa Marie Streegan sa Sogod.

Si Provincial Local Government Operations Officer Jerome Gonzales nalipay kaayo sa kahapsay sa eleksiyon sa LMP ug igo na lang silang nagsuperbisar niini. Sa ubang liga, ang piniliay dumalahon sa Department of Interior and Local Government.

Apan sa LMP, sila si Mayor Jesus Fernandez Jr. sa Pilar, Merlou Derama sa Boljoon ug Dean Michael Singco sa Ginatilan ang naglangkub sa election committee nga nipahigayun sa eleksiyon.( /EIM) (BANAT NEWS)