Riding in tandem murder suspect gi-kombikto
CEBU, Philippines - Gisilotan sa korte nga mabilanggo sulod sa tibuok kinabuhi ang usa ka batan-on nga lalaki nga maoy akusado sa pagpatay sa giingon sakop sa Crips Gang didto sa dakbayan sa Talisay niadtong Oktobre 10, 2001 sa ala 1:00 ang takna sa kabuntagon.
Si RTC-7 Branch 12 Judge Estela Alma Sinco nipahamtang sa maong silot ngadto kang Raffy Bonjoc nga lumad nga taga dakbayan sa Talisay. Namatud-an base sa mga gipresentar nga mga ebidensiya nga siya maoy nipusil patay sa biktimang si Redgim Jevesano Taghoy, 19.
Si Bonjoc matud pa nakigkunsabo sa usa ka Allan Delima nga giingon miyembro usab sa Bloods Gang nga karibal sa grupo kinsa padayon pa karong gipangita sa kapolisan.
Ang duha ka mga suspetsado nagsakay og motorsiko ug dihang nakit-an ang biktima sa daplin sa dalan, si Bonjoc mikanaog sa motor ug mipusil sa biktima sa makadaghan nga higayon hinungdan sa hinanaling kamatayon sa biktima.
Ang kombiktado naduot sa kaso tungod sa testimonya sa mga testigong nakakita sa pagkahitabo. (BANAT NEWS)
- Latest
