Mga buildings, lote nga wa bayri ang buhis ibaligya na sa siyudad

CEBU, Philippines - Ang pagsubasta sa daghang kayutaan ug mga building dinhi sa dakbayan sa Sugbo nga wala na buhisi sa ilang mga tag-iya ipahigayon karong Disyembre.

Ang Cebu City Council miuyon sa tinguha sa City Treasurer’s Office (CTO) nga iuktaba og upat ka buwan gikan karon ang pagpahigayon sa subasta aron makapangandam gyud sila sa maong kalihukan.

Si Assistant City Treasurer Tessie Camarillo namahayag nga daghan kaayo nga papeles ang ilang andamon mao nga dili sila makahuman niini kun ang pagsubasta sa katigayunan himoon dayon ning higayuna.

Nasayran nga gatusan ka Real Property Units (RPU)’s sama sa kayutaan ug buildings ang wala na buhisi sa ilang mga tag-iya sulod sa taud-taud na nga panahon mao nga mahimo na kini nga isubasta.

Ang pagbaligya sa katigayonan nga wala na bayari og buhis sa ilang mga tag-iya gitugot sa balaud pinaagi sa Local Government Code (LGC) apan ang mga hingtungdang tag-iya gihatagan og usa ka tuig paglukat sa maong property.

Ang balaud naglatid nga kun atol sa pagsubasta walay mopalit sa hingtungdan nga delinquent property, ang dakbayan sa Sugbo mao na ang maisip nga automatic nga tag-iya sa katigayunan apan mahimo pa nga lukaton sa ilang mga tag-iya sulod sa usa ka tuig. Gipasalig ni Camarillo ngadto sa mga konsehal nga makompleto na nila ang mga supporting documents sa mao nga mga properties unya sa Disyembre. (BANAT NEWS)