Armado nadisgrasya nadakpan

CEBU, Philippines - Tungod sa disgrasya usa ka armadong lalaki nga giingong nakigginukdanay sa laing armadong tawo ang nadakpan sa kapolisan diha sa Poblacion Oriental sa lungsod sa Consolacion sa niaging  gabii.

Giila ang suspek nga mao si Jomar Misa,31, taga Tawason siyudad sa Mandaue. Nakuha gikan kaniya ang usa kalibre .38 revolver ug usa ka paketeng shabu.

Matud pa ni PO2 Jonaskie Romero sa Consolacion Police dihang nahinabi sa Banat News, usa ka tanod ang mitawag sa ilang presinto ug mipahibalo sa duha ka armadong lalaki nga nagmotor ug nagginukdanay.

Sa pagresponde sa mga polis ilang naabtan ang suspek nga nalimbuwad na sa dalan ug nagdalidali unta sa pagpaandar sa iyang motor apan ilang naapsan ug nadisarmahan. Ang suspek wa moila sa tawong iyang gigukod.(/EIM) (BANAT NEWS)