German miugbok sa bata

CEBU, Philippines - Nagtingkagol sa Talisay City detention cell ang usa ka 56-anyos nga German national kinsa giingong namun-og og batang lalaki niadtong Huwebes sa hapon diha sa barangay Poblacion, dakbayan sa Talisay.

Ang suspetsado mao si Klaus Manfred Graeb, temporaryong nagpuyo diha sa San Jose Maria Village, Ward 4, barangay Poblacion, lungsod sa Minglanilla.

Ang biktima 5-anyos, residente sa barangay Poblacion kinsa na-trauma ug nakaangkon og bun-og sa suwang niini.

Sa imbestigasyon ni PO2 Violeta Godinez sa Women and Children Protection Desk (WCPD) sa Talisay City Police Station giingong gigunitan sa suspetsado ang sinina sa bata dayon giisa kini unya gibusdak ug naigo ang suwang sa bata diha sa sakyanan nga giparada.

Si Supt. Resty Santos, officer-in-charge sa TCPS kinsa mitabang sa pagdakop sa suspetsado mibutyag sa Banat News nga sa wala pa mahitabo ang maong insidente si Graeb nag-inom kini uban sa laing mga foreigner.

Giingong nakita ni Graeb ang bata nga nagduwa-duwa diha dapit sa iyang sakyanan ug nagtuo ang German nga gibadlisan  sa bata ang iyang kotse hinungdan nga giduol niya kini ug gidapatan.

Ang inahan sa bata daling mi-report ngadto sa police station sa hitabo hinungdan nga ang mga polis uban kang Santos daling miresponde sa hitabo.

Matud ni Santos nga si Graeb mibuhi kini og dili maayong mga pulong nga nagkanayon “fucking Filipino, Philippines steal my money….corrupt government!”

“Ako siyang gibadlong kay dili maayo iyang gipanulti ug gipahinumduman nga naa siya sa Pilipinas….Giingnan nako siya nga kung wala siya makauyon mopauli siya ngadto sa ilang lugar, dunay mireklamo niya maong amo siyang giimbitar,” ni Santos pa.

Si Graeb kagahapon gikatakdang pasakaan og kasong kalapasan sa Akta Republika 7610 kon “child abuse.” Sa laing bahin, si Jacquelyn Graeb, 31, asawa sa langyaw nga nahinabi sa Banat News kagahapon mibutyag nga ang iyang bana apektado sa ilang problema kabahin sa ilang negosyo.

Matud ni Jacquelyn nga ang iyang bana usa ka IT expert ug nagtrabaho kini kaniadto sa usa ka bangko sa Germany sulod sa pito ka tuig apan mi-resign kini tungod kay nagplanong anhi na lang sila mopuyo sa Pilinas ug magnegosyo na lang.

Gibutyag ni Jacquelyn nga ang iyang igsuon kinsa presidente sa youth ngadto sa Quezon City maoy ilang gipadala sa puhonan  apan gikwestyon kini kay government employee kini maong gi-freeze ang P6 milyones nila nga kwarta sa bangko. (Brenda D. Batuto/EIM)

Banat News nagsaulog sa iyang birthday

Usa ka simple apan mabulokong 19th Anniversary ang gihimo sa nag-unang pamantalaan  sa Central Visayas ang Banat News.

Sayo pa sa buntag, gihimo ang Medical Mission sa The Freeman Foundation inabagan usab sa mga sakop sa Naval Forces Central ug Cebu City Government nga napahimuslan sa katawhang nangita og libreng medical service.

Human sa tibuok adlaw’ng medical mission, gihimo usab ang Santos nga Misa diin tipik sa wali ni Fr. Bryan Brigoli ang kalabot sa paghigugma sa isig ka tawo. Ang espesyal nga adlaw sa Banat News naghatag og timailhan nga padayun kining modalit og mga balitang angayang masayran sa katawhan.

Mapasalamaton ang Banat News sa mga padayung nagsunod ug pabiling tinuoray nga Banat News readers sud na sa 19 ka tuig.

Among gipanaad nga sa mosunod pang katuigan  magpadayon usab ang paglambo ug pagpanindot ning kinaham nilang basahon.

Mapasalamaton usab ang Banat News ngadto sa misuporta sa maong kasaulogan, ilabi na sa atong Chairman nga si Dr. Jose “Dodong” Gullas, sa atong Presidente nga si Sir Miguel Belmonte, Vice Chairman John Vicente Gullas, atong General Manager Sir Melandro “Boy” Mendoza ug sa paggiya ni Sir Juanito Jabat nga mao ang Publisher sa Banat News.

Nagpasalamat usab ang Banat News sa  kapolisan sa Waterfron Police Station nga gipanguluhan sa ilang Chief Insp. Wildemart Tiu kinsa kanunayong nagsuporta ning mantalaan; Mandaue City Mayor Jonas Cortes ug Vice Mayor Romeo Villarante ug Konsehal Danny Caballero sa Talisay City.

HAPPY 19th ANNIVERSARY Banat News! Hangtod pa sa sunod nga mga katuigan kita gihapon ang magkauban. (/EIM) (BANAT NEWS)