Dispatser gipusil angol

CEBU, Philippines - Kritikal ang kahimtang sa usa ka dispatcher nga gipusil sa  wala hiilhing duha ka lalaki nga nagsakay og motorsiklo sa dalan Maximo Patalinjug , barangay Pajo, dakbayan sa Lapulapu alas 12:00 pasado kagahapon sa  udto.

Ang biktima mao si Michael Bonbon alyas Acoy, 40 , ulitawo ug nagpuyo sa sitio Humay-Humay sa barangay Gun-ob sa maong dakbayan.

 Si PO1 Jade Querubin sa homicide section sa kapolisan sa maong dakbayan nga nahinabi sa Banat News miingon nga nanawag  og pasahero nga mosakay og multicab nga pasaheroan  ang  biktima dihang kalit lang nga gihunongan sa motorsiklo nga giluwanan sa mga suspetsado.

Dugang pa niya nga ang backrider  niini kalit lang miibot sa armas nga giluklok  dayong pusil  sa biktima sa makadaghang higayon.

Nasabak  sa  tiyan ug ibabaw   nga  bahin  sa  tuong bukton   ang  biktima.

Human sa  mahagba  sa yuta  ang  biktima dali nga mipabulhot   sa motor  ug  mipahilayo   ang  mga  kriminal  gikan sa maong  lugar.

Samtang  ang  biktima  dali   nga  gihatod   ngadto sa Lapulapu City District Hospital apan human sa pasiunang pagtambal dali kining gibalhin ngadto sa Vicente Sotto Memorial Medical Center sa dakbayan sa Sugbo.

Si PO1 Querubin miingon nga sa crime scene maoy ilang nakaplagan ang upat ka mga kabhang sa armas  ug  duha  ka  bala sa kalibre .45   nga  pistola  nga  gituohan  nila  nga  gikan sa armas sa mga kriminal.  (BANAT NEWS)